Safiirka Somalida ee dalka Kenya ayaa sheegay in maanta ay ku guuleysteen xabsi ku yaala magaalada Mombasa ee dalka Kenya in ay ka sii daaayaan maxaabiis Soomaali ah oo tiradoodu ay gaareyso 80 ruux kuwaasoo xiliyo kala duwan la soo xiray ka dib markii lagu eedeeyey iney si sharci daro ah ku soo galeen gudaha dalkaasi.

Safiirka Somalida ee dalka Kenya Maxamed Cali Nuur (Amerika) oo la hadlay warbaahinta isagoo ku sugan magaalada Mombasa ayaa waxaa uu sheegay in sii deynta maxaabiista Soomaalida ay ka dambeysay markii ay wadahadalo qaatay muddo dheer la galeen masuuliyinta dowlada Kenya, kuwaasoo uu sheegay in ugu dambeyn ku qanciyeen iney sii daayaan dadkaasi Soomaalida oo isugu jira rag iyo dumar.

“Markii la sii daayey ka dib dadkan waxaan rabnay inaan iska fasaxno basas ayaan u diyaarinay hase ahaatee waxaan ka baqnay in mar labaad ay hadana qabtaan ciidamada amaanka maadaaama aysan sharci wadanin, ka dib waxaan wadahadalo la yeelanay madaxda QM gaar ahaan kuwa Kenya u jooga UNHCR waxaana u sheegnay sida ay wax u jiraan, ka dib waxaa la saaray baabuur gaar ah oo lagu geeyo xeryaha qaxootiga oo ay ku jiraan dad badan oo Soomaali ah” ayuu intaa ku daray Safiir Amerika.

Soomaalida ku nool Magaaladda Mombasa iyo maxaabiista la sii daayey ayaa aad u soo dhaweeyay dadaalka Maxamed Cali America uu sameeyey iyagoo ku tilmaamay Halyeygii Qarniga maadaama uu ka shaqaynayo sidii loo xushmayn lahaa oo loo daryeeli lahaa Soomaalida dhibta uga soo cararay dalkooda ay dagaaladu aafeeyeen, waxayna ugu baaqeen safiirka inuu sii wado dedaalkiisa uu ku garab taagan tahay shacabkiisa.